Avqustun 25-də Masallı rayon Heydər Əliyev Mərkəzi, Tarix-Diyarşünaslıq Muzeyi, Mərkəzi Kitabxana və Gənclərin İnkişaf və Karyera Mərkəzinin Lənkəran-Astara regional nümayəndəliyinin Masallı bölməsinin birgə təşkilatçılığı ilə “Laçın-MDB-nin Mədəniyyət paytaxtı-2025” 26 Avqust Laçın şəhəri günü münasibəti ilə “Gözəlliklər diyarı Laçınımız”mövzusunda dəyirmi masa keçirilib.

İlk öncə Ulu Öndər Heydər Əliyevin və Azərbaycan Respublikasının ərazi bütövlüyünün bərpa olunması uğrunda canından keçmiş şəhidlərin əziz xatirəsi bir dəqiqəlik sükutla yad edilib

Tədbiri giriş nitqi ilə açan Masallı rayon Heydər Əliyev Mərkəzinin direktoru Dilbər İbayeva bildirmişdir ki, Azərbaycan Respublikasının Prezidenti cənab İlham Əliyev 31 iyul 2023-cü il tarixində işğaldan azad edilmiş ərazilər üzrə şəhər günlərinin təsis edilməsi ilə bağlı mühüm bir sərəncam imzalamışdır.Bu qərar,Vətən müharibəsində əldə olunmuş tarixi qələbəni əbədiləşdirmək və həmin şəhərlərin azad edildiyi günləri xüsusi olaraq qeyd etmək məqsədi daşıyır.

Daha sonra Masallı rayon Mərkəzləşdirilmiş Kitabxana Sisteminin əməkdaşı geniş məruzə ilə çıxış edərək qeyd edib ki, otuz ilə yaxın dövrdə erməni vandalizminə məruz qalan Laçın özünün yeni dövrünə qədəm qoyub. Bu gün Laçın şəhərinin küçələri ilə gəzərkən genişmiqyaslı quruculuq işləri ilə yanaşı 30 ildən sonra doğma yurdlarına qayıtmış laçınlıların çöhrəsində qürur və sevinc ifadəsinin şahidi olur, yeni həyatın başlandığını göstərən evlərdən, həyətlərdən insanların danışıq və gülüş səslərini eşidirik. Bu gün laçınlılar Laçın şəhəri gününü 30 il həsrətində olduqları doğma evlərində qürur və sevinc hissi ilə qeyd edirlər.

Daha sonra Qarabağ müharibəsi Əlilləri,Veteranları və Şəhid ailələri ictimai birliyin Masallı rayon filialının sədri Nahid Rəhimov,Aprel döyüşlərində,44 günlük Vətən müharibəsində,Xüsusi Təyinatlı Qüvvələrdə Murovdağdan Şuşaya kimi şanlı döyüş yolu keçmiş,Qarabağ və 3-cü dərəcəli Rəşadət Ordeni ilə təltif olunmuş ehtiyatda olan qazi komandir Nazim Cəfərzadə, Masallı rayon Tarix-diyarşünaslıq muzeyinin direktoru Əntiqə Tağıyeva çıxış edərək bildirmişlər ki, Laçın şəhəri Azərbaycanın dağlıq bölgəsində, mühüm coğrafi mövqedə yerləşir. O, Qarabağı Azərbaycanın digər bölgələri ilə birləşdirən qapı rolunu oynayır. Zəngin təbiəti, dağ çayları, yaylaqları, eləcə də qədim abidələri Laçını Azərbaycan mədəniyyətinin incilərindən birinə çevirir. Azğın düşmənin torpaqlarımızı işğal etdiyi dövrdə Laçın şəhəri dağıntılara məruz qalmış, evlər, məktəblər, mədəniyyət ocaqları məhv edilmişdi. Bu gün isə şəhər yenidən dirçəlir. Dövlətimizin həyata keçirdiyi “Böyük Qayıdış” proqramı çərçivəsində Laçında genişmiqyaslı quruculuq işləri aparılır, yeni yaşayış binaları, məktəblər, xəstəxanalar, sosial obyektlər tikilir. Laçının azad olunması və şəhərin bərpası Azərbaycan xalqının milli birliyinin, ordumuzun gücünün və dövlətimizin iradəsinin təntənəsidir.

Tədbirin sonunda iştirakçılarla xatirə şəkilləri çəkilib.