9 Noyabr – Dövlət Bayrağı Günü münasibətilə, Gənclərin İnkişaf və Karyera Mərkəzinin (GİKM) Lənkəran-Astara Regional Nümayəndəliyinin Lerik bölməsi və Lerik Rayon Heydər Əliyev Mərkəzinin birgə əməkdaşlığı ilə Lerik Rayon Bayraq Muzeyinə gənclərin ziyarəti təşkil olunub.

Ziyarət zamanı Mərkəzin elmi işçisi Bahar Mürsəliyeva gənclərə Bayraq Gününün əhəmiyyəti və tariximizdəki rolu barədə geniş məlumat verib. Dövlət bayrağımızın xalqımızın müstəqillik və milli dəyərlər simvolu olduğunu vurğulayaraq, bayrağın hər bir azərbaycanlı üçün qürur və vətənpərvərlik rəmzi olduğunu bildirib.

Gənclərə Azərbaycan bayrağının tarixi, rənglərinin və simvollarının mənaları haqqında ətraflı məlumat verilib.

Muzey eksponatları ilə tanışlıq zamanı gənclər Azərbaycanın dövlət bayrağının tarixi inkişafını əks etdirən nadir eksponatları yaxından görmək imkanı əldə ediblər. Sonda isə müzakirələr aparılaraq gənclərin bayraq və vətən sevgisi ilə bağlı fikirləri dinlənilib.