Noyabrın 4-də Lerik rayon Mədəniyyət Mərkəzindıə XTQ mənsubu, Şəhid baş leytenant, "Şuşa, Xocavənd və Kəlbəcərin azad olunmasına görə", "Vətən uğrunda", "Şücaətə görə" medalları  və "Azərbaycan bayrağı" ordeni  ilə təltif edilmiş Yaqublu Əliqismət Mükafat oğlunun qəhrəmanlıqlarla dolu döyüş yoluna həsr olunmuş, yazıçı Nüşabə Məmmədlinin qələmə aldığı " Zəfər zənguləsi" adlı romanının təqdimatı keçirilib.

Tədbirdə Lerik Rayon İcra Hakimiyyətinin məsul işçiləri, idarə, müəssisə, təşkilat rəhbərləri, Şəhid ailələri, müharibə veteranları, qazilər, məktəblilər və rayon ictimaiyyəti iştirak edib.

Tədbirdə çıxış edən Lerik Rayon İcra Hakimiyyəti Başçısının müavini Arzu Vəliməmmədova 44 günlük Vətən Müharibəsində  müzəffər Ali Baş Komandan İlham Əliyevin rəhbərliyi ilə qəhrəman ordumuzun  Qarabağı düşməndən azad etməsindən və Zəfərin qazanılmasından danışıb.

Sonra yazıçı-publisist Etibar Muradxanlı, Lerik rayon Ağsaqqallar şurasının sədri Elxan Qənbərov, əməkdar müəllim Gültəkin Şıxəliyeva,  Lətifə Məmmədova, Tərxan Feyziyev və digər çıxışçılar kitab haqqında təəssüratlarını və Şəhid baş leytenant Əliqismət Yaqublunun qəhrəmanlıqları haqqında danışıblar. Kitabın müəllifi  yazıçı-publisist Nüşabə Məmmədli kitabın yazılması və ədəbi qəhrəmanları haqqında söhbət açıb.

Sonda Şəhid Əliqismət Yaqublunun atası Mükafat Yaqubov çıxış edərək müəllifə və zəhməti olanlara minnətdarlığını bildirib.